Ua faamauina i le aso e 5,630 tagata ua faamaonia le aafia i le Koviti-19 i totonu o Niu Sila i le 24 itula talu ai. Ua faailoa mai e le matagaluega o le soifua mālōlōina o le taimi nei e 362 gasegase o le koviti o loo faataotolia i maota gasegase e aofia ai ma le to’afā i potu tigaina.
O le tuuina mai o le lipoti aupito lata mai o le faama’i mo le atunuu atoa mai le matagaluega ua ta’ua ai foi e to’a 17 isi tagata na aafia i le koviti ua faamaonia ua maliliu ma ua oo ai ma le aofa’i o tagata maliliu i le 1,432.
Mai le aofa’iga lea ua maliliu e to’aiva e mai Aukilani, tasi mai Waikato, tasi mai le Bay of Plenty, to’alua mai Taranaki, tasi mai Hawkes Bay ma Midcentral, Canterbury ma Southern. O le taimi nei i le atunuu e 34,124 tagata o loo aafia i le Koviti-19.
Ua faailoa foi i le lipoti o se tamaititi e i lalo ifo o le 10 tausaga le isi tagata o loo aofia ai i le aumaliliu e pei ona ta’ua. Ua faailoa foi e to’a 65 isi gasegase o le koviti na malaga mai I totonu o le atunuu.
