O le asō ua faamaonia mai e le matagaluega o le soifua mālōlōina e 10,772 tagata ua faamaonia le aafia i le vairusi o le Koviti-19 i le atunuu. O le folasaga lea mai le faatonu aoao o le soifua mālōlōina Dr Ashley Bloomfield ma ta’ua ai e 788 tagata ua aafia i le koviti o loo taofia nei i maota gasegase, o lona uiga ua faaitiitia teisi mai nai lo le aofai na iai ananafi.
Ua faailoa foi e to’a 21 isi tagata ua maliliu e iai sootaga i le faama’i. O le feiloa’iga a le faatonu o le matagaluega ma le autusitala i Ueligitoe na faailoa ai foi, e foliga ua toe tau faaitiitia mai le aofai o tagata aafia pe a fua i nai aso ua tuanai ae o loo fautuaina pea e ono toe siitia foi le numera.
Fai mai Bloomfield e to’alua foi tagata mai le komiuniti a Aukilani ua faamaoia le aafia i le omicron BA 2.75 ma o loo faanofoesea i aiga ma iai sootaga i faigamalaga i fafo atu o le atunuu.
