O le lipoti lata mai o le Koviti-19 mai le matagaluega o le soifua maloloina i le asō ua iloa ai e 10,710 isi tagata ua aafia i le faama’i i totonu o le 24 itula talu ai.
Ua faaauau ai pea ona maitauina le siitia o le aofai o tagata e aafia i le Koviti-19 i le taim nei ma o se tulaga o loo fautuaina mai e le matagaluega ua ao lava ona silasila ai i le faia o tulaga uma e malupuipuia mai ai mai le faamai aemaise foi o le flu masani lea foi ua lipotia le siitia o le aofai o tagata e aafia ai.
E 554 gasegase o le koviti o loo taofia pea i maota gasegase e aofia ai le to’a 12 o loo i potu tigaina.
Ua faailoa foi e le matagaluega e to’a 15 tagata maliliu ua faamauina talu mai le aso 28 o Iuni. E to’a 10 le itupa o alii ma le to’alima o le itupa o tamaitai ma e mātele i le aumatutua e silia ma le ta’i 70 tausaga seia oo i le silia ma le ta’i 90 tausaga.
