I se lipoti lata mai o le faalavelave na tulai mai i Amerika i le aso ananafi na ulufale ai se tamaitai i se tasi o ekalesia tele i Texas faatasi ma se auupega ma se tamaitiiti 7 tausaga ma amata loa ona tafana tagata sa i totonu o lea nofoaga peitai na uma ai ma lona soifua ina ua tafana ane e leoleo sa iai i le nofoaga lea i lea taimi.
Ua ta’ua i lipoti na aafia ai foi ma le tamaitiiti na o la o atu atoa ma se tasi alii sa iai i lea nofoaga ma ua ta’ua e tigaina le tamaitiiti.
O loo faia nei le suesuega ae ua faamaonia mai o lea tamaitai e 36 tausaga o Genesse Ivonne Moreno ma e oo mai i le taimi nei e lē o faamautuina mai le mafuaaga ua faia ai e lea tamaitai lea gaioiga aemaise poo le ā le sootaga o lea tamaitai i le tamaitiiti.
O le ekalesia lea a le alii faievagelia lauiloa o Joel Osteen ma o nisi lipoti ua ta’ua ai o le fana na faaaogā e le tamaitai ua maliu sa tusia ai upu Free Palestine.
