E lima vaiaso ua faatulaga e suesue ai molimau o le faamasinoga o moliaga o Samuelu Su’a ma Sivai Kepi Mamea, o le tamaitai o Lise Marie Schmidt, o Li’o Faataumalama Auava, ma le faipule o Salega Tasi, Afioga Fepulea’i Faimata Su’a.

I le toalima o loo molia i le mataupu lenei o loo tatala i tua i aiaiga le toafā ae nofo taofia pea Samuelu.

O le aso 26 o le masina o Aokuso o le tausaga nei o le a faia ai lea faamasinoga ina ua teena ai le talosaga a ē o loo molia ina ia tolo i le tausaga fou, ona e lē avanoa mai i le tausaga nei nisi o loia i fafo sa faamoemoe e finauina a latou tali tetee i o latou moliaga.

E pei ona lipotia ai le faaiuga a le faamasinoga i le talosaga e tolo i le tausaga fou lea ua teena, ua faaalia ai e le faamasino sinia le afioga Talasa Lumepa Atoa Saaga, o loia i Samoa ua tauaveina finauga a ē ua molia o laui’a i le galuega ma e taualoa foi o latou tulaga i le tomai faaloia.

O loia o loo tulai mo i latou o loo molia, o Unasa Iuni Sapolu, Tanya Toailoa, ma Miruel Lui.

E lē itiiti ifo ma le 80 molimau ua tapena e lagolagoina le itu a leoleo, ae ua sauni foi molimau a i latou o loo molia ma o loo tetee i moliaga o le tuuina atu o molimau sese i leoleo, taumafai e ufiufi le mea moni, taumafai e fafau molimau ma faamatalaga sese faapea moliaga o le faia o faamatalaga e faaleaga ai le isi tagata.

O moliaga uma nei e mafua mai i le suesuega na faia i le mafuaaga o le maliu o Tuu’au Faasavalu, ae o se suesuega na faia e aunoa ma se ioega a le Komesina o leoleo.

E 104 moliaga o Samuelu Su’a ae 59 moliaga o Sivai Kepi.

O le Faipule ia Fepuleai Faimata Su’a e 18 moliaga, o Li’o Faataumalama Auava e 9 moliaga, ma le tamaitai o Lise Marie Schmidt e 4 ona moliaga.