O le 65 o tagata na faamauina i se vaiaso talu ai ona ua aafia i le fiva ponaivi, o lea ua toe sau le isi tala lata mai i le auaunaga a le matagaluega o le soifua maloloina ua iai le faaopoopoga e 44 tagata ma e fulisia lava i fanau i le matutua e i lalo o le 10 tausaga ma nisi ua 60 ma sili atu le matua o tausaga o le soifua.
I le masina o Novema o le tausaga na te’a nei na amata ona mata’itū ma faamauina ai tagata ua aafia i le fiva ponaivi poo le dengue fever, ua oo mai i le masina nei o Me tusa ua lima nei masina, ua oo atu le aofaiga o tagata i Samoa ua faamaonia i suesuega faafomai ua nofo ai le vairusi o le fiva ponaivi i le 342.
O kalafi o faamaumauga mai le soifua maloloina o loo manino mai ai le saoasaoa tele o le pepesi o le faama’i lenei i nuu tu taulaga ma nuu i le itu i Matu i Sisifo o le motu o Upolu.
O loo fautuaina pea le atunuu i auala o puipuiga i le faamamā o le laufanua e ala i le lafoai o lapisi ma otaota e tau tuufua ai namu, ufiufi tino i ni ofu, momoe i ta’inamu ma faaasu namu, ma faaaogā spray e tutuli ai namu.
O nofoaga pogisa e lē o fautuaina le agai iai ona e fiafia tele namu e nonofo ai.
