E lima lelei faigamalaga a le Qantas na toe faafoi mai ae ua i luga o le ea i le vaiaso ua tuanai ae fai mai le faauluuluga o le vaega o faigamalaga faavaomalo ma le lotoifale e le o iai ni faaletonu i le kamupani vaalele.

Na lipotia i le asō e le 9News o le faamatalaga mai le faauluuluga lea o le Qantas International and Domesic, Andrew David ua ia faailoa ai lea faamatalaga ma ia faaalia ai a faatusa foi i isi kamupani vaalele e laitiiti atu faigamalaga ua toe faafoi mai a le Qantas.

Fai mai David e matuai leai ni tulaga o aafia ai le Qantas ma e eseese uma foi tulaga na mafua ai ona toe faafoi mai faigamalaga i le vaiaso talu ai.

O se malaga a le Qantas na sau mai Nadi i Sini fai mai na toe faafoi i le aso ananafi ina ua feta’ua’ina o se manogi o le afi i cabin o le vaalele.

O le Aso Lulu o le vaiaso talu ai o le malaga mai Aukilani i Sini na le mafai ona faaaogaina le isi afi le vaalele ma faailo ai le ono manaomia o se fesoasoani e ui sa tulaueleele saogalemu.

E lua isi malaga agai i Melepone na toe faafoi foi i le Aso Faraile, o le Aso Tofi talu ai na toe faafoi mai ai foi se malaga mai Sini i Fiti ona sa ta’ua o se tulaga o loo ono faaletonu i le vaa, mechanical issue. 

Ua faatoese ai le faauluuluga o pasese uma i luga o ia faigamalaga ae o loo mau pea lona faatuatuaga i le kamupani vaalele ma ana faiga tau le puipuiga i feoaiga a le atunuu.