O le Aso Gafua i Samoa le amataga o lenei vaiaso ua amata ai ona faagasolo polokalame o le Teuila o lenei tausaga.
O lea ua fulisia polokalame i maketi e faatau ai galuega taulima ma lavalava, faapea foi ma fale’aiga, ae o le Aso Lulu o le a maimoaina ai e le atunuu e aunoa ma se totogi le vaega muamua o le tauvaga e saili ai se tausala o Samoa, lea ua faatulaga o le a faia i le eleele fou i le nofoaga o le Friendship Park.
O le a faamasino ai vaega e tolu muamua e aofia ai le sarong, o le puletasi ma le vaega poo le category ua ta’ua o le coconut.
O se vaega e fou i le tauvaga lenei e pei ona faailoa ai i le polokalame.
O isi vaega e pei o fesili ma tali a tamaitai tauva e to’asefululima, faapea taleni o le a faia i le po mulimuli o le tauvaga, le po lea o le Aso Toonai.
O le Multipurpose Gym i Tuanaimato o le nofoaga lea o le a faia ai lea vaega mulimuli o lea tauvaga o le taualuga o polokalame uma o le Teuila.
O le Aso Faraile a o lei faia le tauvaga e saili ai se tausala o le atunuu, o le a tapunia ai polokalame ma o le aso foi lea o le a faagasolo ai le tauvaga o taavale teuteu o le a faalauiloa ai ma tamaitai tauva o le a saili ai se tausala o le atunuu.
