O le faaitu i Saute o Beirut, o Dahiyeh lea ua aga’i tonu iai le mamafa o osofa’iga a Isaraelu mai le po anapo faasolo mai i le taeao analeila.

Ua tele mea ua faaleagaina e aofia ai ma le faaleagaina o nisi o fale tetele e aumau ai tagata i le faaitu lava lea.

Sa mua’i faailo e le IDF poo le Israel Defense Force i tagata e aga’i ese mai ma lea nofoaga ona o le a faalautele atu iai osofa’iga ma o lea la ua faatino.

O le Aso Gafua lava ia na te’a nei e to’a 36 na maliliu ma le 150 na manunu’a i osofa’iga i le itu lea i Saute o Lepanona ma ua faamaonia mai lea e le matagaluega o le soifua mālōlōina i lea atunuu.

I lipoti mai le CNN ua ta’ua ai e sui o Malo Aufaatasi, o le popolega e i’u ina feagai foi Lepanona ma mafatiaga o loo feagai ma Gaza ona ua vaaia o le tulaga foi lea sa iai Gaza i le tuana’i.

I se lipoti mai osofa’iga a le Hezbollah ua faailoa ai o loo faaauau pea ona tafana ane meatau aga’i i Isaraelu ae ua faailoa foi e Isaraelu o loo faaauau foi ona tali atu i faamata’u mai lea faalapotopotoga ma ua fasiotia le faitau afe o le aufaatupu faalavelave ma le isi tagata e sosoo atu i le latou ta’ita’i na fasiotia talu ai.

I se taimi e le’i mamao atu sa faatonuina ai e Isaraelu le falema’i e tasi o loo tatala i le itu i Matu o Gaza ina ia aveesea mai tagata o loo iai i totonu i le isi 24 itula.

Puna o Faamatalaga: https://edition.cnn.com/world/live-news/israel-gaza-lebanon-war-10-08-24-intl-hnk/index.html