Na fiu le autusitala e tu’ifesili le ta’ita’i o le Labour, Chris Hipkins poo le ā se fautuaga a le Labour i se fuafuaga e ono fesoasoani i le tulaga pagatia ua iai nei le atunuu, ae pau lava le tali a le ta’ita’i, o le matāfaioi tonu lena a le Malo, o le saunia o metotia ma ni auala e faaleleia ai le faafitauli ua iai le atunuu.
Na ia ta’ua ni ta’iala e pei o le iai o ni lagolagosua e tatau ona fesoasoani i tagata o loo maulalo a latou tupe maua, ma o le tulaga masani o le a mana’o le Labour ina ia faamautinoa se suiga aga’i i le malosi’aga faafouina.
Ina ua mae’a le fono a le autusitala ma le Malo, na tatala ai le folasaga amata a Hipkins i le faapea mai, ua tele vaiaso talu ona afaina le lalolagi atoa i le taua i Iran, ae o lea lava e le’i mautinoa e le faigāmalo poo le ā se tala e tuuina atu i tagata o Niu Sila i le auala o le a tali atu ai i lenei afaina.
Peita’i, e le’i mafai e Hipkins ona ofoina mai ni aikia o ni faiga faavae e faamatilatila mai ai pe faapefea e le Labour ona fesaga’ia lenei faafitauli pe ana faapea o latou lea e tumalo mai nei.
Na fesiligia foi e le sui o le Herald poo ā ni gaioiga e tatau ona fai e fesoasoani ai i aiga, ae tali Hipkins, “e mana’omia ona tula’i mai le Malo e aumai sana fuafuaga faataatia”.
Na tu’ifesili pea le ta’ita’i o le Labour, ae o lana tali lea, “E tele matou aikia o le a iai, ae o le a faato’ā faamatala atu pe a oo i le taimi o faalauiloa faatosina o le palota.”
E tausisi pea Hipkins i lona manatu, o le matāfaioi tonu lea a le faigāmalo, ma e na te fia vaai atu poo le ā le fuafuaga a le Malo a o le’i faaalia iai sona manatu.
Puna o Faamatalaga: https://www.newstalkzb.co.nz/news/politics/labour-leader-chris-hipkins-not-offering-policy-ideas-to-help-kiwis-amid-fuel-price-rises/
