Ua faalauiloa e Saina le uluai vailaau o le Koviti i le lalolagi atoa e mānava atu i le gutu (se’i tulou).
O le vailaau lenei na amata gaosia i le aai o Shanghai ma o loo ofo mai o se booster fou mo tagata na faia muamua o latou tuipuipui o le Koviti.
O Saina e le o iai ni ana poloaiga e faamalosia ai le tui o le Koviti, peitai o loo manao ia toatele nisi e filifili e faia tui o le booster a o lei faamāmā ana sā.
I molimau a nisi i tala a le Stuff mai Saina, e pei lava o la e inu le ipu susu ma o le taimi e mānava ai i totonu i le gutu e suamalie lona tofo.
Ae i se lipoti mai le WHO (World Health Organisation) pe a ma le 12 vailaau e le o ni tui ae ua suia i le sinifi o lea ua suesueina i le lalolagi.
Ae i se manatu mai Saina, o se isi lea faiga lelei mo i latou e fefefe i le tui.
