E oo mai i le taimi nei, e lē o pisa tele mai le Kainga Ora poo le ā le tonu o fale o le malo na faaleagaina i lologa i le amataga o le tausaga.
E 10 masina lea ua oo mai iai, ma e lē o mausali lava poo fea a fai iai le tusa ma le 2000 fale a le Kainga Ora lea o loo aofia ai ma le 205 fale i Aukilani i Saute, poo fale nei i Magele na faamalosia ona aveesea mai tagata ona ua lē saogalemu.
E toatele aiga i Saute o Aukilani na alu uma le tele o meaafale i lologa, ma ua faaalia e nisi i tala a le leitio a Niu Sila o le lē manino ma lelei fesootaiga ma le Kainga Ora, o le faafitauli lea.
Faaalia ai e nisi o molimau o loo taumate pea poo fea a fai iai, aemaise e leai ni inisiua o meaafale ua faaleagaina.
Ae mai le Kainga Ora, o lea o loo galulue nei ma le Auckland Council e talanoa pe fia ona fale e mafai ona agavaa i le faiga o le a faatau ai e le malo faapea le Council, fale o Aukilani ua lē mafai nei ona toe nofoia.
Peitai e iai lipoti e lē o aofia ai fale a le Kainga Ora i le lisi o fale o loo vaavaai iai le Auckland Council.
