E lei mautinoa se faaiuga a Niu Sila i le ulufale mai o pasese mai Saina, e ui o lea na fai mai e maua ananafi le tonu.
E oo mai i le taimi o tala fou o loo tālia pea pe faamata e mulimuli Niu Sila ia Ausetalia ma isi atunuu lea ua toe tapa siaki o le Koviti mo pasese e faimalaga mai Saina a o malosi ai le Koviti i Saina.
O le aso a taeao e amata faamamalu ai e Ausetalia le toe faamalosia o le tatau ona faia o le siaki o le Koviti mo pasese uma mai Saina.
Mai le minisita o loo tu mai i le foe Stuart Nash i le Aso Gafua na ia ta’ua o ananafi e maua ai se tala mautinoa mai le malo, peitai e uma ane ananafi e lei maua se tala ma o lea ua faatali i le asō.
A o faatali ai se faaiuga a le malo, o le vaiaso talu ai na faaalia ai e tagata suesue faapitoa e le toe moomia le faafoi mai o siaki nei e faia muamua a o lei oso i le vaalele mo pasese e faimalaga mai Saina, peitai e oo mai ananafi ua sui tala ma fai mai ai ua o latou lagolagoina le tatau ona faia o siaki ona e le o tele se tala mai Saina.
