Ua toe ave le faamanatu a le ofisa o faigafaiva i le matagaluega o faato’aga i le aufagogota, ma le aufaatau i’a ma figota ina ia tausisia le fua o i’a ma figota i le lapopo’a e tatau ai ona faaaogā aemaise i le faatau atu i le atunuu lautele.

Ua faailoa ai e le ofisa le faasalaga e sefulu afe tālā ua aiaia pe a lē usitaia lea aiaiga o ana tulafono faatonutonu.

O loo galulue faatasi le matagaluega o faato’aga ma faigafaiva ma le matagaluega o leoleo i le faamalosia o le tulafono faatonutonu o faigafaiva o le tausaga e 1995, ma o loo molimauina ai le asia pea e sui o ia matagaluega o le nofoaga o le maketi o i’a i Savalalo e mata’itū poo talafeagai le lapopo’a o i’a ma figota o loo faatauina ai. 

Faaalia i se pepa faalauiloa mai le matagaluega o faato’aga ma faigafaiva, o le puleaina o fua talafeagai o i’a o se laasaga tāua lea e taofia ai le soona fagotaina ma ia mautinoa o le a maua pea e tupulaga o Samoa i le lumana’i, i’a ma figota mai i faigafaiva auā le saogalemu mo le fofoga taumafa.

E tāua foi le sao o le lautele o le atunuu i le mata’itūina poo talafeagai le fua o le lapopo’a o i’a ma figota o loo faatau savali atu iai, pe o fagotaina foi e le autautai o o latou nuu ma afio’aga.