E leai se tulaga lamatia o fanau mai toto o loo foaia e tagata na faia tui o le Koviti.
O le tali mai lea a tagata suesue a o sulu iai le matagaluega a le soifua maloloina i le tulafono mo lana faasinomaga i le mataupu e le o mananao ai matua o le pepe e fa masina le matua, e talia toto o loo foaia e tagata ua uma ona fai tui o le Koviti e faaaoga i le taotoga o le fatu o le la tama.
E tusa ma le tasi selau tagata na lagolagoina matua o le pepe faatasi ai ma aiga na faatasitasi i le Faamasinoga Maualuga i Aukilani ananafi i le valaauina o lenei mataupu, ma o le Aso Lua o le vaiaso fou lea e valaau ai molimau.
Ae mai le faatonu sili o le Immunisation Advisory Centre Dr Nikki Turner, e leai se aafiaga pe a faaaoga toto o loo foaia e tagata sa faia o latou tui o le Koviti.
O le sulu ai o le matagaluega i le tulafono e le tupu soo e tusa ma saunoaga a le minisita o le soifua maloloina Andrew Little, peitai o le teena ai e matua o togafitiga ona o lea mafuaaga ua tapa ai le fesoasoani a le faamasinoga i lalo o le tulafono ua ta’ua o le Care of Children Act lea e aiaia uma ai itu e lua.
Na saunoa le minisita, e tatau i matua ona toe silasila lelei i le la faaiuga ma talia fautuaga a le soifua maloloina.
