Ua sa’oloto se taulealea sa molia faatasi ma isi alii e to’atolu i le faia o se gaioiga na oo ai le maliu i se isi taulealea, e mafua mai i se inuga avamalosi.
O le mataupu lenei ua silia i le lima tausaga o taoto i le faamasinoga sili a le atunuu, ma mafua ai se talosaga a le tamaitai loia o Ann Matalasi sa tulai mo Nuulua Burgess, e taofi le su’esu’eina o moliaga poo le stay of proceedings ona ua fai si umi o tālia pea tapenaga a leoleo.
O le talosaga lea na tālia ai se tali a loia a leoleo, ae mulimuli ane avatu le talosaga a leoleo e toe ave i tua moliaga ona ua lē maua ni mau e lagolago ai.
O lea la ua tālia le talosaga ma ua faaui i tua ma faalēaogā moliaga o le fasioti tagata faamoemoeina, moliaga o le fasioti tagata pa’ivalea, ma le moliaga o le umia o se aupega mata’utia.
Ua totoe ai nei taulelea e to’atolu sa molia faatasi ma Nuulua Burgess e tali i moliaga uma ia o loo latou teena.
O le masina o Me o le tausaga e 2017 e tusa o faamaumauga a leoleo, na tula’i mai ai lenei solitulafono ma maliu ai Joe Muliipu poo Sapakuka Muliipu o se tane o Fasitootai.
