Ua uma su’esu’ega na faia i vaiinu sa tuua’ia na mama’i ai turisi a o iai i se tasi o faletalimalo i Fiti, ma fai mai ai e leai se mea e iloa ai na iai ni vailaau faasāina na faaoona ai vaiinu a nei turisi.
O le mataupu lenei ua lē nofonofo lelei ai Fiti ona ua ta’uleagaina ai lona igoa i le lalolagi, ae o lea e faamoemoe tele i le maketi o turisi mo le atina’eina o lona atunuu.
E to’afitu tagata na mama’i ma ave ai i le falema’i, ma o lea na tuua’ia ai e iai le ‘ava malosi na faasolitulafono ona sui ai le pina colada a o iai i le faletalimalo a le Warwick Fiji.
Na faia ai ma su’esu’ega ma iloa ai e leai se faamaoniga a mea na faaoona e se tasi, ma ua faamaonia mai foi e le Sui Palemia o Fiti o lea ua te’a uma mai i tua mai le falema’i tagata na aafia.
Ua faatalosagaina ai foi e le Sui Palemia atunuu i fafo ia faalēaogāina nei loa lapata’iga ua faia mo le aga’i atu o turisi i Fiti.
Ua molimau mai le sui o le soifua mālōlōina a Fiti e tusa ma tala a le 1News, e masalomia o le aafiaga na iai turisi e mafua mai i se gasegase poo faama’i foi.
Puna o Faamatalaga: No methanol or illicits detected in cocktail, Fiji says
