O loo faaauau pea ona leaga vaa feoai i le sami a le Interislander, ma ua iai le popolega e lē o aogā ona fealua’i.
O le po o le Aso Lulu lea na momoe ai le pasese sa i luga o le Kaitaki a le Interislander ina ua lē mafai ona sau i totonu e taula lelei ai, ma i faamaoniga e lē toatele se pasese sa i luga o le vaa ma o le toatele foi o avetaavale a pisinisi o loo faaaogāina lenei auaunaga.
O le taeao ananafi na faatoa toso mai ai e taula i le uafu i Ueligitone, ma ua fai mai ai pasese e masani ona faaaogāina vaa nei e feoa’i i le va o le North ma le South Island, o lea ua savali le 2 tausaga o faaauau pea ona fai ma leaga vaa ma e foliga mai ai e lē aogā ona toe feoa’i.
Saunoaga a le Pule Sili o le Transporting New Zealand i tala a le leitio a Niu Sila na ia ta’ua ai, o loo faaauau pea ona faatuai femalagaa’iga a vaa ma tuai atu ai ma le fela’uaiga o uta o loo faamoemoe i le Interislander.
O le vaa lava lenei e tasi na tulai mai ai foi le isi faalavelave ia Ianuari lea na toe faanatinati ai ona aveesea mai le pasese ona ua motusia le eletise, ma i suesuega na maua ai o le lē lelei ona vaaia e le KiwiRail o ana vaa le isi mafuaaga, i le lē faia o siaki e mautinoa ai le saogalemu.
Ua faatoese le KiwiRail i le faaletonu na tulai mai i le po o le Aso Lulu, ma le tala ua uma ona fai le Kaitaki.
