O loo faamalumalu i luga a’e o Samoa se fetaia’iga o matagi ua aumai ai timuga ma savili malolosi ua mafua ai ona sousou le sami ma lē taunuu ai nisi o malaga a vaa i le va o Upolu ma Savaii.
O malaga o le taeao i le Aso Tofi na tuai ai ona malaga ese malaga i taimi faatulagaina ae sa faaauau ina ua tau maua si to’a ma taunuu manuia i uafu o Mulifanua ma Salelologa.
O nisi o pasese mai Savaii sa tulituli taimi o malaga a vaalele e tuua ai le atunuu mo le malaga atu i Niu Sila ma Ausetalia, sa polepole i lē maua le vaalele ona o le faatuai o malaga a vaa o le sami e mafua i uiga faaletonu o le tau, peitai sa maua lava taimi o a latou faigamalaga ma malaga ese ai ma Samoa.
O le puipuiga o le saogalemu o le soifua o tagata malaga i vaa o le Malo, o le faamuamua lea a le faalapotopotoga o vaa a Samoa, o loo tautuaina faigamalaga i le va o Upolu ma Savaii faapea foi malaga tai vaiaso i le va o Apia ma Pago Pago.
