O loo agai Niu Sila ma Fiti e faamautu le maliega e saga faamalosia ai le galulue faatasi o militeli a atunuu e lua ma fesoasoani Niu Sila i le faamalosia o agavaa o le militeli a Fiti.
O le tala lata mai lea mai le faigamalaga a le Palemia o Fiti, Sitiveni Rabuka a o iai i Niu Sila e le gata e feiloai ma le komiuniti Fiti ae faapea sui o le malo o Niu Sila.
O Fiti o se tasi o atunuu e tolu o le Pasefika e mausali militeli, ma o le tausaga talu ai na sainia ai faigafaapaga i le va o Niu Sila ma Fiti e galulue faatasi ai e le gata mo le puipuiga ae faapea le toe tau faatulai o tamaoaiga.
O se tasi lenei o mataupu o loo galulue nei iai Niu Sila, Ausetalia faapea ma a laua paaga o le taumafai e tatai ese mai atunuu Pasefika mai le agai atu e osi faigafaapaaga ma Saina e pei ona faia ai nei ma Solomona.
O le maliega na toe laga i le malaga mai o Rabuka ma feiloai ai ma le Palemia o Niu Sila, Chris Hipkins i le vaiaso nei, o loo aofia ai ma tekonolosi fou e fesoasoani ai i militeli ma o le vaiaso fou o loo fuafua e faamautu ai loa.
O le asō e toe taliu ai le faigamalaga a le Palemia o Fiti ma lana aumalaga.
