O ananafi na faalauiloa ai e le taitaifono o le Lakapi Samoa, le lisi o le ‘au a le Manu Samoa o le a sauni mo lana taamilosaga i Europa i le masina fou, ma sa aofia ai ma le suafa o le alo tautaua o Samoa sa taalo mo le All Blacks, ae ua avanoa nei e taalo mo le Manu Samoa, lea alii o Steven Luatua.
Peitai o le asō lea ua toe sau ai se isi tala faanoanoa mo le ‘au a le atunuu, o le a lē avanoa le alii o Steven mo lea malaga taamiloa a le ‘au, ona o loo malolo pea o ia mai le taaloga ona o ni manu’aga o loo aafia ai.
O lenei lipoti faamautinoa na maua mai le alii faiaoga o le ‘au o loo taalo ai nei Steven i Europa, le Bristol, le alii o Pat Lam, ma ta’ua ai e Lam, o loo malolo pea Luatua ona o loo faamanu’alia, ma o le a lē avanoa ai foi e taalo mo Samoa i le malaga taamilo lea ua tapena atu i ai le ‘au lea na faalauiloa mai ai ma lona suafa i tama taaalo.
E 15 taaloga a le All Blacks sa taalo ai Luatua, ma o lana taaloga mulimuli mo le ‘au tele a Niu Sila o le tausaga e 2016; o le tausaga lea na filifili ai loa Luatua, o le a tuua le All Blacks ae me’i atu e saini lana konekarate na ofo mai iai e le kalapu a le Bristol, i le mae’a ai o le malaga taamilo a le ‘au a le Liona i le 2017 i Niu Sila.
O le suiga lena a Luatua na faamuta ai foi ma lana konekarate lakapi ma Niu Sila, ona e filifili lava e le Alll Blacks ana tama taaalo na o i latou o loo nonofo pea i Niu Sila.
Peitai o le suiga na faia talu ai nei a le World Rugby i ana tulafono mo le agavaa ai o se tama taaalo e taalo ai mo lona atunuu, na mafai ai loa ona avanoa Luatua i le tausaga lenei e taalo mo Samoa talu mai ona mae’a le taimi lea sa taofia ai ona suia se isi ‘au e taalo ai mo se taaloga faitaulia, talu mai lana taaloga faitaulia mulimuli na taalo ai.
O le avanoa lea o Luatua na faaaofia ai loa e le alii faiaogaulu o le Manu Samoa, Seilala Mapusua i le ‘au lea o le a sauni atu mo ana taaloga faitaulia ia Novema e faia i Padova i Italia, Georgia, ma Bucharest i Romania.
Peitai ane o lena filifiliga ua faia ae galo ai o loo faamanu’alia Luatua ma o loo faaauau ona lē avanoa mo ni taaloga e oo mai le taimi nei.
