Ua lē talitonuina e Malele Atofu Paulo loia i Samoa, o lana faamatalaga lea i le faamasinoga, ma ua tuu loa iai le avanoa mulimuli e saili ai sana loia mai fafo o loo manao iai, ina ua talia e le faamasinoga i le Aso Faraile na tea nei le faamavae o le loia na totogi e le Malo e tauaveina se folasaga mo Malele e fua iai se faasalaga i lona moliaga o le taupulepule e tagatavale lē sa avea ma Palemia.
I le avanoa na faatalanoa ai Malele i le faaiuga o le vaiaso, na ia faailoa ai o loo manao e toe apili le faaiuga ua faamaonia ai lona moliaga peitai e lē o le tapenaga lea a le loia na totogi e le Malo, ae na fesili atu pe ua salamō, remorse, ae e lē o malamalama iai lona tagata pe aisea ua fesili atu ai le loia i lea tulaga.
O le sailiga o se loia mai fafo e na o le lua vaiaso ua tuu avanoa ai le faamasinoga ia Malele, ona lau lea o lona faasalaga i le aso 28 o le masina nei o Iulai.
Pe maua se loia pe leai e faaauau lava ona lau le faaiuga i se faasalaga.
O lea loia mai fafo pe a maua o le a totogi e lē ua molia, peitai ua ia faailoa ua na leiloa poo ai ua na tapunia lana itulau o le api o foliga sa faia ai lana sailiga seleni mo se fesoasoani i se loia.
Le susuga Malele Atofu Paulo i se faatalanoaga i le faaiuga o le vaiaso.
O le masina o lumanai nei o Aokuso e atoa iai le fā tausaga talu ona molia Malele ma Lema’i Faioso Sione i le moliaga o le taupulepule e faaoo le maliu i se isi tagata, o le moliaga na molia ai foi le isi taulealea o Taualai Leiloa na ioe ma o loo tuli lona faasalaga i le falepuipui.
O le isi e toafā ai i latou o loo molia o Talalelei Pauga e faamautu i Ausetalia, lea o le a aumai faapagota i se taimi o le tausaga nei e tali i le moliaga na taupulepule ai e faaoo le maliu i le susuga Tuilaepa L Sailele Malielegaoi sa avea ma taitai o le Malo e ala i le tofi Palemia.
