Ua talia e sui sa auai i le fono faaletausaga a le asosi o tusitala ma le aufaasalalau a Samoa le lipoti a le Pelesetene ua toe filifilia, ae ua teena le lipoti o tupe ona e iai vaega o loo nenefu ma lē manino i le faaaogāina o seleni o se polokalame faalea’oa’oga sa faatupe e le UNESCO lea sa faatino i le masina o Tesema o le tausaga na te’a nei.

O faamaumauga na tuuina atu i le lipoti a le su’etusi e fua i faamaumauga i le teugatupe a le asosi o loo faailoa ai se aofaiga e 37 afe tala sa faatupe ai lea a’oa’oga, peitai o se vaega tele o lea seleni na faaalu i le totogi o le konesale sa tapenaina le auivi o le talosaga faalea’oa’oga poo le proposal na tuuina atu i le UNESCO.

Ua talia ai e le asosi o tusitala ma tagata faasalalau le JAWS i lana fono faaletausaga le toe faafoi i le laulau ua lē toe filifilia, e sa’ili mai faamaumauga a le UNESCO e iloa ai le vaevaega o tupe faaalu i alagatupe eseese poo expenses o lea a’oa’oga, lea e tatau ona manino ai ma le aofa’iga o le tupe sa maua e le konesale. 

O le faai’uga o le fono faaletausaga a le asosi na filifilia ai ma lana Komiti Faafoe mo le isi nofoa’iga e 12 masina.

Ua toe filifilia Lagi Keresoma o le Talamua i le tofi Pelesetene, ae o le susuga Seiuli Francis Vainalepa o le televise a le Iunivesite Aoao a Samoa ua avea ma Sui Pelesetene.

O le afioga Galumalemana Ronna Lee o le TV1 i Mulinuu ua avea ma failautusi, ae lagolago iai Adele Fruean o se tusitala mo le televise a Ausetalia le ABC.

O Lilomaiava Maina Vai o le Radio Samoa i Apia ua avea ma teutupe ae lagolago iai le tasi o sui tusitala sinia mai lea ualesi faasalalau.

O le faletua o Angie Kronfeld Polu o le Talamua ma Ganasavea Manuia o le Samoa Global ua avea ma sui o le Komiti Faafoe.