Faailoa e le susuga i le Peresitene o le Asosi a Foma’i, Afioga Taulealeausumai Dr Titi Lamese i se latou feiloaiga ma nisi o le aufaasalalau i le Aso Faraile, ua toe faapafala le latou faaiuga lea na muai agiga mai i faasalalauga, o le a lē toe faigaluega ai foma’i i faaiuga o vaiaso poo le Aso Toonai ma le Aso Sa, ma o le a na o le valu foi itula faigaluega o foma’i i aso e lima o le vaiaso, mai le itula e valu i le taeao i le ‘afa o le fā i le afiafi.
E ui i lea sa faaleo e le afioga i le peresitene lo latou lē fiafia i saunoaga a le afioga i le Minisita o le latou matagaluega ina ua lauga i totonu o le Palemene i le Aso Tofi i le mataupu lea o loo faavaatu’ia ai le auaunaga a le matagaluega aemaise i le asosi a alii ma tamaitai foma’i.
Saunoa Lamese, e lagona lava le faanoanoa i lafoga a le latou minisita, ona e pei ua leai se aogā o le latou tautua o loo faatino i le ao ma le po, ma ua latou lagona foi ua lē malu i latou i lo latou taitai.
Ae na saunoa Dr Lamese, mai a latou fetalanoa’iga ma le komisi o tagata faigaluega le PSC, o lea ua latou talia ai le tele o nisi o faamanuiaga poo penefiti ua faatulaga atu.
O ni vaega na saunoa manino Lamese, o mea nei ua leva sa tatau ona faatulaga mo latou, ae o lea ua avea talanoaga o loo faaauau, ua masuiga mai ai i se tulaga lelei vaega nei.
Pau le tatalo a le alii Peresitene, e tāua lava le faatalanoa ma faamauina tusitusia ina ia iai ni faamaoniga o nei fetalanoa’iga.
Saunoa Lamese, e ui o lea ua toe tafa le finagalo o le asosi ma ua lē faataunuuina ai le latou leva na semanu e amata i le Aso Toonai, aso 1 o Iulai, ae o loo latou moomia pea ona faaauau ni fetalanoa’iga ma le PSC ina ia faamaioio lelei vaega uma ia o loo moomia e le asosi a foma’i.
O lea la ua toe foi le auaunaga a foma’i i le tulaga masani sa iai, ma na toe foi uma lava foma’i e galulue ia latou tiute masani i le Aso Toonai, ma le faasolo atu i le vaiaso ou.
Saunoa faaiu Lamese, o le latou faaiuga e ono toe aapa iai e faatino loa, pe afai e uma ane fetalanoa’iga o loo faagasolo pea, ae lē o matuā faamalieina i latou i aiaiga uma.
