Semanu e silasila le atunuu i se isi faalavelave tulaga ese foi e tulai mai i Aukilani pe ana taunuu faamoemoega o se tasi alii talavou lea ua faailoa nei e leoleo nisi faamatalaga auiliili i ana taupulepulega sa faia.
E le o mafai ona faailoaina le suafa o lea alii ae ua ta’ua i le Herald pe a ma le fa tausaga talu ai sa faailoa ai le initalesi o le tagata lea i vesiga o loo tulai mai i Sasae Tutotonu ma iu ai lava ina ia faamatala i se tagata na o la fetaui i luga o upega tafailagi o ia ua sauni e agai i le isi sitepu o se osofaiga lea o Aukilani ma lona faamoemoe ia fasiotia ai le tusa ma le 20-30 o ni tagata e le ni Mosalemi.
Fai mai le lipoti na faaauau pea ona talanoa le talavou lea i le tagata i luga o le social media ae lilo i ona manatu o loo ia talanoa i se leoleo nanā, ua ia faasoa uma iai ana fuafuaga mo Aukilani ma nofoaga ua ia fuafua e osofai.
Fai mai o le aso 8 o Setema o le tausaga talu ai na faamatuu ai le poloaiga a leoleo e sueina le fale o le talavou lea ma maua iai le tele o mea sa ia faamatalatalaina i le leoleo nanā.
Tele nisi o mea e faasauni ai se osofaiga faaterolisi na maua i le potu o lea talavou ma o nisi nofoaga o loo aofia ai ata i ana fuafuaga na faia e aofia ai le Auckland Town Hall, Spark Arena ma le SkyCity.
