E ui ua sau le tala fiafia ua iai le avanoa e faigofie ai ona iloa meaaoga o loo faia e faaaoga ai le ChatGPT, ae lē o nofonofo lelei ai pea faiaoga o iunivesite.
O le ChatGPT o se faiga fou faatekonolosi e mafai ona ia tusia meaaoga a fanau.
O le taeao o le Aso Lulu na faamanino mai ai ua mafai e le Turnitin lea o loo faaaoga e iunivesite e valu i totonu o Niu Sila e iloa ai meaaoga kopi mai isi upega tafailagi ma tusitusiga ona faigofie ona ia iloaina.
Peitai e le o lava lea i faiaoga o iunivesite ona e le gata o faiga nei e fai lava si saoasaoa i le tomai faatekonolosi, ae e ono iai le avanoa e alu alu foi iloa e fanau aoga ona faia nisi metotia e sao mai ai.
Ua fai mai ai ma le faiaoga sinia o le iunivesite a Victoria i tala a le Newshub, Dr Simon McCallum, o le mea moni e moomia e faiaoga se taimi sei toe faaaupega ai ma siitia lo latou iloa ia mafai ai ona faafetaia’i faiga nei ua sao mai.
Na ta’utino le faiaoga sinia ua saoasaoa atu mea e iloa e faiga tekonolosi nei na i lo faiaoga.
I molimau a nisi o fanau aoga, o le ChatGPT o la latou uo lelei e faaaoga i aso uma.
