Ua faate’ia le to’atele i le tala ua oo mai i le lē mafai ai ona tausiniō o le tama’ita’i fusu o Jasmine e Daunakamakama i le su’egasiamupini i le lalolagi i taaloga o faipelega i le malo tele o Peretania (UK) ina ua lē ausia e lea tama’ita’i taalo ta’iala faatulagaina, o iloiloga o ituaiga tagata taaalo poo le vaega ua faaigoaina o le (genetic sex verification test).
O le Jasmine o se tama’ita’i Fiti, ae o sē e iai ona faasinomaga i Samoa (Fijian/Samoan) na maua lona avanoa e fai ma avefu’a a Fiti i taaloga faavaomalo nei peita’i ua lē taunuu talu ai nei suiga ua tuuina mai e le faalapotopotoga o taaloga faipelega i UK.
Ae i se lipoti, na faaalia ai e le Asosi o Faipelega a Fiti (Fiji Amateur Boxing Association) faato’ā o latou iloa lava suiga fou o iloiloga nei i le masina o Iulai, ma o lea lava na taumafai ai loa e mulimulita’ia ta’iala ma fuafuaga ua tuuina mai, ma amata lafo loa a latou faamaumauga poo samples i le UK.
I faamatalaga, e ui i se taumafai atu e le’i maua e i latou le taimi faatulagaina e pei ona ta’ua e oo atu samples ua mae’a le se’i faatulagaina o le taamilosaga (competition draw) ma i’u ai lava ina faalēaogāina ai loa ma le avanoa a Jasmine.
E 13 ia Jasmine tama’ita’i taaalo o lea taaloga ua lē mafai ona tausiniō, e aofia ai Nigeria, Dominica, ma le atunuu o Filipaina.
E na o le pau lea o se tama’itai Fiti – o se alo e faasino foi ia Samoa na filifilia e fai ma avefu’a a Fiti i nei taaloga, peita’i o se faanoanoaga tele o le lē mafai ona faataunuuina ana taumafaiga talu ai nei suiga fou.
I le alia’e mai ai o lenei matāupu, o lea ua faato’ese ai le World Boxing ma ua faapena ona mae’a talanoa foi le Peresitene i le tama’ita’i o Jasmine i Liverpool.
Mo le silafia o lenei faiga faavae fou o iloiloga na amata mo tama’ita’i taaalo i le tausaga 2024 ma o le a faaauau atu mo alii i le tausaga 2026.
E ui ua lē faataunuuina lea moemitiga a le tama’ita’i o Jasmine, ae ua ia faaalia o le a faaaauau pea ona ia toleni malosi mo nisi o taaloga e pei o taaloga o le Taupulega, 2026 Commonwealth Games ia taumfai e saofagā atu i le Olimipeka 2028 i Los Angeles Olympics.
