Ua tele lipoti o le lē fiafia o pasese na totogi pasese i le Jetstar ona o le lē oo o faigamalaga toe sau ma le tala e toe foi i aiga ma fetuuna’i.
Maua e tala fou o le amataga o le vaiaso talu ai na valaau ai leoleo e agai atu i le malaevaalele i Queenstown ina ua lē oo le faigamalaga na fuafua e agai mai i Aukilani ma faifai tetele ai vesiga a nisi o le pasese ma le aufaigaluega na mafua i le lē fiafia o pasese aafia i uiga faaalia ma faamatalaga a le aufaigaluega.
Sau ai i le faai’uga o le vaiaso o le mea lava foi e tasi na tupu i le faigamalaga na fuafua mo Aukilani agai atu i Melepone.
O nei fesuia’iga uma o le to’atele e le’i fiafia i le auala na faaoo atu ai le fe’au mai le aufaigaluega, e lē gata o le umi ona tutū i le kiu lea e faapea toeititi itula ae sau le fe’au e leai ma se tala pe a faafefea nei pasese na totogi a o le toe fetuuna’i o avanoa mo se isi faigamalaga.
I luga o le Herald na lipotia mai ai o le lē oo o le faigamalaga na iai i le faai’uga o le vaiaso faato’ā uma atu na mafua lea ona ua gasegase le pailate i le taimi mulimuli.
O le agia o faitioga a pasese i amio a le aufaigaluega ma le faatinoga o auaunaga a le Jetstar na sau ai ma le faatoesega a le kamupani vaalele i luga o le Herald i ē na aafia.
