Fai mai pe ā ma le 50 pasese a le Jetstar e aofia ai tamaiti ma se tamaitai e faaaoga le wheelchair, na momoe i le malaevaalele i Kuiniselani ina ua oo atu i le 30 itula na faatuai ai se tasi o faigamalaga agai atu i Melepone.

Lipotia e le 7News o le faigamalaga sa fuafua e agai mai le Whitsundays i le taeao o le Aso Lua o le vaiaso nei sa faaleaogaina le faigamalaga ona o mataupu tau le saogalemu. 

Molimau le pasese sa faailoa atu ia i latou e ao ona agai ese ma le vaalele seia faia galuega a inisinia, peitai e uma ane ua silia ma le 24 itula na faatali ai.

O le itu e faanoanoa ai pasese ona o le lē lava ma le lē lelei o fesootaiga mai le kamupani vaalele ma iu ina avea o se faafitauli le sailia o nofoaga e agai iai e faatali ai le umi lea o le faatuai.

Lipotia na momoe ai nisi i luga o le foloa o le malaevaalele ma nofoa.

Faatoa mafai ona agai pasese i Melepone i le tea o le tolu i le aoauli ananafi. 

Fai mai le Jetstar sa galulue malosi le aufaigaluega i le sailia o ni nofoaga mo pasese peitai e itiiti potu na avanoa ane ae sa faaoo lava vouchers, taumafa ma meainu mo i latou ma ofoina foi le toe totogi atu o tupe sa faaalu mo mea sa nonofo ai nisi.