E ui e lē mafai ona solo tetee, ae o lea ua vaavaai i nisi auala e savavali ese ai ma galuega a o loma le fonotaga a le pulega o le matagaluega a leoleo i le vaiaso fou ma iloa ai le tonu.
O lea ua tusa ma le tausaga o talanoa le malo ma le asosi o leoleo e tusa ma le isi ofo o totogi o leoleo, ma o le ofo na toe aumai i luma i le Aso Faraile talu ai e lei fiafia iai le asosi ma o lea e na te lei fia tuuina atu foi i leoleo e palota.
E lē o fiafia leoleo i le ofo na toe fofola mai e le Malo i le Aso Faraile mo o latou totogi, ma e faapea e tutusa lava le ofo o le Aso Faraile faatoa uma atu ma le ofo lea na aumai ia Setema o le tausaga talu ai.
Na faamatalaina ai e le peresetene o le asosi o leoleo Chris Cahill, e matuai lē fiafia iai le toatele ma e matagā pe a oo nei i se tulaga e savavali ese ai malu o le malo.
O le ofo na aumai o loo sau ai le 4% siitaga o totogi e amata mai ia Iulai o le tausaga fou, $5000 faaopoopo i luga o le totogi amata ma e toe faafoi i tua i le masina o Novema o le tausaga talu ai lona totogiina mai.
I lalo o maliega o loo aiaia ai galuega faaleoleo e lē mafai ona savavali ese ma tiute, ma ua lipotia e le Stuff o lea ua vaavaai i isi itu e teena ai galuega ovataimi faapea taimi o malologa.
O le finau a le peresetene, ua faitau masina o tatali a o lenei e sau e i lalo mai o totogi o isi tagata faigaluega a le malo lea na teena ia Setema.
O se faamaoniga mai ia Cahill, o le siitaga mulimuli o totogi o leoleo o le lua tausaga talu ai e 3.5%.
Ae mai le minisita o leoleo Mark Mitchell, o loo ia teena faamatalaga e faapea e lē o amanaia e le Malo leoleo ma o loo sese foi itu o loo ave iai la latou faamuamua.
Fai mai le minisita, e lē o faigofie le taumafai o le malo i taimi o loo faaletonu ai le tamaoaiga peitai o loo taumafai pea i le mafai e gata ai.
