A o taumafai ai nisi atunuu tetele o le lalolagi e faamalosia le faamiliteliina o vaega o le Pasefika, ua faamalosi’au ane ta’ita’i o le Pasefika, e tumau pea ona avea le vaega lenei o le Pasefika o se ata o le filemu, ae lē o le vevesi, o le saunoaga lea a le Palemia o le Atu Kuki, Mark Brown.
Ta’ua e le RNZ faato’ā toe taliu atu i lona atunuu i le mae’a mai o le fonotaga lona 54 a ta’ita’i o le Pasefika sa faia i Honiara.
Fai mai Brown afai e iai se taimi e tatau ai ona matua’i faaāta atu le manatu lea o le Pasefika o se ata o le filemu, o le taimi tonu lenei.
E faafetaia ai e Brown le Palemia o Fiti, Sitiveni Rabuka sa amataina mai le taumafaiga lea ina ua talimalo le Atu Kuki i le fonotaga lea i le 2023.
O le agaga e pei ona ta’ua e Brown e faailoa atu i le lalolagi, o le Pasefika e lē faamalosia i le aofa’i o ona tagata poo le faaopoopo o le militeli poo vaapetolō ma vaamaulu ae mana’omia e le Pasefika le lelei o le tamaoaiga ma puipuiga mai aafiaga o le tau.
Puna o Faamatalaga: https://www.rnz.co.nz/international/pacific-news/575405/cook-islands-pm-pacific-region-remains-a-theatre-of-peace
