Ua faaalia nei e le alii Palemia o Niu Sila, Christopher Luxon le tatau ai ona patipatia e le atunuu le faai’uga a le malo na folasia ma faamauina i le fonotaga a Malo Aufaatasi, o le lē amana’ia lea e Niu Sila o Palesitina, e ui ina faamaonia le amana’ia e le Malo Aufaatasi.
I lipoti mai le leitio faavaomalo a Niu Sila (RNZ) o Aotearoa le tasi o atunuu mai lea fonotaga i Niu Ioka (New York) na manino lo latou lē taliaina o le faai’uga a le Malo Aufaatasi; e aofia ai Amerika, Iapani ma Korea i Saute.
Faamanino e le ta’ita’i o le malo ia Luxon, e lagolagoina e Niu Sila le fuafuaga e pei ona galulue aga’i iai le fo’ia o le faafitauli; ma o le faigafaavae ua faaigoaina o le two-state solution, ae lē talia e Niu Sila le avea o Palesitina ma atunuu a o puleaina e Hamas Gaza.
Ta’ua foi e Luxon e lē faapea ua lagolagoina e le atunuu Isaraelu, ae o le faai’uga e faaalia ai e manana’o Niu Sila i le filemu; talu ai ua tele soifua ma ola ua aafia ona o nei vevesi ma taua.
Ua valaau ai foi Luxon ia Hamas ina ia faasa’oloto nai tagata na o latou ave faapagota poo tagata o taua, ma taofia nei loa a latou gaioiga sauā.
Ae ua una’ia e Niu Sila Isaraelu, ina ia taofia loa ona faatino gaioiga e lepeti ai le filemu o tagata.
Faamanino foi e le alii Palemia, e ui o nei faai’uga o loo avea pea iai le lagolago a Niu Sila, i le Pulega a Palesitina (Palestinian Authority) ia latou taumafaiga e faamausalī ai gaioiga ma faatinoga e aloa’ia ai le avea ma se setete a o se atunuu.
Puna o Faamatalaga: https://www.rnz.co.nz/news/political/574427/kiwis-can-be-proud-nz-isn-t-recognising-palestine-yet-pm-christopher-luxon
