O se teine talavou e na o le 16 tausaga o loo togafitia nei i le falemai ona o manuaga i le ulu ma le maeaalio ma le isi teine talavou foi e 16 tausaga o loo faamanualia foi i le ulu ma foliga ona o se faalavelave tau taavale na aafia ai.

Ua faamaonia mai i le asō i tala mai le 7news e toalima talavou o loo tulaga tigaina ina ua fetoai le taavale na malaga atu ai ma se laau ma mu ai le taavale.

O le faalavelave na tupu i Cammeray poo le lata i le lima i le afiafi ananafi, ta’ua mai ai se taavale o le Holden Commodore ua agai ese ma le auala ma fetoai ai ma se laau i West St.

O nisi faamatalaga mai leoleo i le faalavelave lea ua ta’ua ai sa lipoti ane ia i latou se vevesi o loo osofaia ai se tamaititi 17 tausaga ma sa fai se tonu e fetaui ma tagata sa i totonu o le Commodore lea ae le o faailoa maia le mafuaaga o lea feiloaiga.

Fai mai leoleo o sina taimi puupuu sa tuli ai le taavale ma leoleo ae lei tu ane ma faamuta ai e leoleo le tuliga ona o le tulaga na vaaia ai le alu a le taavale lea, sa faaauau pea ma iu ai ina fetoai ma le laau.

Na vave le tali atu a leoleo ina ua tupu le faalavelave atoa ai ma le fesoasoani a nisi o le atunuu na mafai ai ona aveesea mai le toalima lea sa i le taavale ua mu ma faatino iai galuega laveai.

Na auina atu i le falemai ma o loo iai latou ia i ni tulaga tigaina mai manuaga. Feta’ua’ina o le isi teineititi 16 tausaga sa aveina le taavale ae o lē e ana le taavale o se alii e 18 tausaga sa i le pito i tua ma isi alii e toalua tai 17 tausaga le matutua.

O loo faaauau nei suesuega a leoleo.