Na poloka foi feoa’iga a taavale i le taeao analeila i le faaitu o le Southern Motorway i Aukilani ina ua lavevea ni taavale i le State Highway 1 i le va o le Princes St ma Mt Wellington ma poloka ai laina e lua o le motorway, tau faalavelavea atu ai ma le isi laina lona tolu i lena lava auala.
Faato’ā toe kilia auala na i le 11 i le taeao analeila ina ua toe tatala uma laina o le auala mo feoa’iga.
Ta’ua e leoleo na oo atu auaunaga mo faalavelave faafuase’i ona o ni taavale na lavevea.
O le 9.30am i le taeao na tula’i ai le faalavelave tau taavale i le State Highway 1 e latalata i le itu i Mātū o le a alu ese atu mai le motorway e aga’i i Princes St.
E tele tagata na avatu i le falema’i i ni manu’aga mitimiti.
E le’i umi atu lena faalavelave, ae vaaia foi se isi poloka o taavale i le silia ma le 4km le mamao mai le Princess St i le itu i Sasa’e aga’i i Saute o le East Tamaki Rd i le pito e afe atu i le motorway.
Sa iai ni ata na pu’eina ma vaaia ai se tama’i taavale ua matuā faaleagaina ma se loli lea e lavevea faatasi i le ogatotonu o le motorway.
O loo lipotia mai pea le tele o faalavelave tau taavale ua aafia ai foi soifua.
I le faai’uga lava ia o le vaiaso talu ai, e to’aono tagata na lipotia mai le maliliu i ni faalavelave tau t’avale i vaega eseese o le atunuu.
O ananafi, na iai se faalavelave tau taavale na maliu ai se tagata i Waiohau, Bay of Plenty, ae maliu le isi tagata i se faalavelave i le State Highway 43 i Stratford i le taeaopo ananafi lava.
O le taeao lava foi ananafi na maliu ai foi se isi tagata ina ua lavevea ni taavale se lua i le Auckland Southern Motorway e latalata i Onehunga.
I le faaitu i Saute o Aukilani, e to’alua ni tagata na maliliu mai ni faalavelave eseese tau taavale se lua na tutupu, ae o le po foi o le Aso Toonai talu ai na maliu mai ai se tasi i Hamilton ina ua lavea foi se taavale.
O loo faagasolo pea su’esu’ega a leoleo i nei mau faalavelave.
Puna o Faamatalaga: https://www.nzherald.co.nz/nz/people-injured-after-multi-vehicle-crash-blocks-lanes-on-aucklands-southern-motorway/SNFAZAXVSFHVLBGZFHRUAJSHPQ/
