Ua patipatia nei e le to’atele ni gaioiga alofa a ni ‘aufaifaiva i le taumafai ai e lavea’i mai o se isi vaa ua māua faamatalaga o loo iai i se tulaga pagātia ona o le loulouā o le tau, ma le sou tele o le vasa.
I faamatalaga e faapea, ua amata faamae’a galuega a le vaega o le Prospector 2, talu ai foi le oo atu o tala i tulaga loulouā o le tau ua amata ona fetaia’i nei, ma o lea na tapena ai loa o le a aga’i i uta i le pa’u mātū ae faalogoina loa e le ‘aufaifaiva le valaau o loo iai se vaa e faaigoaina o le Candy ua tauāu na lē mafai ona aga’i mai i le pa’u mātū ona o le sou tele o le vasa i tai atu lava o le Te Awaiti.
E le’i faapea na toe mafaufau le Prospector 2 ae toe liliu le vaa ma e ta’ua i faamatalaga e 30 minute faato’ā oo le Prospector 2 i le vaa o le Candy, ma e faapea ua fai lava sina maualuga o le mea ua oo iai le vai i totonu o le vaafagota.
O le agaga faafetai e ui i le lutaluta o le tai, na faasaoina uma ma o le fiafiaga foi o le mafai ai e le ‘auvaa ona oo i nai tama na moomia le fesoasoani.
E pei ona faamauina e le kapeteni o le Prospector 2, William McWilliam pau lona mafaufau i lena taimi o le iloilo lelei o vaega e mafai ona o latou tali atu ai i nai auuso ua pagatia.
