O le afiafi o le Aso Tofi pe o le toe 20 minute i le itula e 4 na faate’ia ai le to’atele na i luga o le vaa la’upasese sa faimalaga atu mo Waiheke i le tula’i ai o se mū i luga o le vaa i le oo atu o le vaa i Hauraki Gulf.
I lipoti mai le RNZ na faanatinati atu sui o auaunaga o faalavelave tutupu faafuase’i – e 3 vaa lavea’i o le Coastguard NZ ma sui o le tineimū e tali atu i lenei faalavelave.
Ta’ua e to’a 18 le pasese na i luga o le vaa ma le ‘augalulue e to’aono a le vaa na faimalaga atu ae alia’e mai loa lea faafitauli.
Faamauina foi i lipoti, sa iai se tasi o tagata fealua’i vaa, Bruce Cameron na iai i se vaa e latalata i le motu o Motutapu, na ia faalogoina le oo atu o se valaau mo se fesoasoani i le tusa o le 3.50pm; ta’ua foi lona iloa atu o le asu o alu a’e mai le vaa, pe ā ma le 1.5 maila le mamao mai le motu.
Lipotia, sa iai se vaa, o le Fullers Ferry na toe liliu e aga’i i le itu o iai le vaa la’upasese, e taumafai e tali atu i le ave’esea mai o le pasese peita’i e le’i manuia ana taumafaiga talu ai tulaga e lē tutusa le maualuluga o vaa e lua, ma le sou tele o le vasa, ua lē saogalēmū ai lena tulaga.
Peita’i na mafai ona lavea’iina ma le saogalemū uma le pasese ma le ‘augalulue o le vaa.
Ua faatino nei su’esu’ega i le māfua’aga o le mū ai o lea vaa.
