E to’alima tagata na lavea’iina mai le Tasman Bay ina ua sa’e le vaa na malaga ane ai, e to’atasi le tagata na togafita mo manu’a mitimiti ma aveina atu ai e le vaalele helicopter i Nelson.
Fai mai le Herald na logoina leoleo i le faalavelave lea i le ‘afa o le 12 i le aoauli ma agai atu loa iai le vaega o fesoasoani faavavave. O le to’alima la lea na maua uma atu i le vai ma aveina ane ai e le water taxi.
Fai mai le faamatalaga na maua atu i latou ia ua matuai aafia ona o le mālūlū ma faia loa iai togafitiga a paramedic. O loo lelei le tau i Tasman Bay ma e lē o iai foi ni savili malolosi.
O le vaa na aafia ua tosoina e le Coastguard i Kaiteriteri pe ā ma le 2km mai le nofoaga na iai. O loo faia su’esu’ega i le mafuaaga o lea faaletonu.
