Ua lavea’i e le susuga Charlie Vaai ma lona faletua o Beatrice Ott Vaai atugaluga o le aufaigaluega a le kamupani gaosi ‘ava malosi o le Vailima beer i Vaitele ma le to’atele o le atunuu, ina ua salalau se finagalo o le pulega o le kamupani o le a siitia i Fiti e gaosi ai le pia a Samoa. 

O ananafi na faailoa faalaua’itele mai ai e le pulega o maketi a le kamupani le sainia ai o se aiaiga faaletulafono poo se memorandum of understanding i le va o le Samoa Breweries Limited ma le susuga i le alii loia ma lona faletua ua tuuina atu iai le laisene e faaauau ai ona gaosia i Samoa lea oloa tau ‘ava malosi. 

O le faai’uga o le tausaga nei sa fuafua e mae’a ai galuega o le gaosia o le beer o le Vailima i lo tatou atunuu ae faasee atu loa i Fiti, peitai o se faai’uga na lagalagā ai finagalo ma lagona o le aufaigaluega ma fesiligia le mafuaaga o le faai’uga, ma talosaga ai i le pulega e toe liuliu le tofa ma iloilo le faai’uga pe ua talafeagai. 

O se talosaga a le aufaigaluega e silia i le to’alimasefulu o lea ua maua le tali fiafia, o nisi lava o tamafanau a Samoa o le a pulea le gaosiga o le Vailima ma e faatumau pea i o tatou laueleele e lē aveesea ma le nofoaga na fofoa ma amata ai le gaosiga o lea oloa. 

O le Aso Lua o le vaiaso nei na feiloai atu ai le susuga Charlie Vaai ma lona faletua, o lona tuaa tina ma le sui o le pulega o le kamupani ‘ava malosi o le Vailima i le afioga i le tamaitai Palemia ma faailoa iai le tulaga ua taunuu iai le fuafuaga e aveesea ma Samoa le gaosiga o lana oloa tau ‘ava malosi sa tafe atu ai seleni i le tamaoaiga o le atunuu, ma maua ai foi galuega.