O le taumafai o se alii tietie uilaafi e sola ese ma leoleo na oo ai ina lavea le uila ma maliu ai lava i le fetaula’iga ala i Barbadoes ma Edgeware Road i Kalaiesetete.

O se faamatalaga mai le ofisa o leoleo i lea faaitu ua ta’ua ai na amata le mataupu lea i le toe 20 i le 12 i le po anapo a o faailoa atu e leoleo e tu ane peitai na te lei usitaia ma iu ina agai sa’o ai lana uilaafi i se isi taavale na alu ane i le fetaula’iga ala e latalata ane ma tupu ai loa le faalavelave.

Na vave iai togafitiga peitai na maliu lava mulimuli ane ae o le avetaavale o le taavale o se tamaitai e manu’a mitimiti. 

O le faalavelave lea e pei ona ta’ua e leoleo o le a tuuina atu i le vaega suesue o faalavelave faapea ma faalavelave ogaoga.

O loo talosagaina nisi na silafia ni faamatalaga i le faalavelave ina ia fesootai ane i leoleo.