E toatele ua faaleo le fiafia ina ua tau manino mai nisi o faamatalaga mai leoleo i le taeao nei e tusa o le faalavelave na manu’a tigaina ai se teine talavou i se fana ona o se faalavelave na tulai mai i luga o le alatele i St Lukes i le po anapo.
Fai mai leoleo o le taavale o le minivan ma le isi taavale o le hatchback sa malaga ane agai i le city poo le lata i le 10 i le po anapo ma ta’ua e leoleo i le lipoti a le televise tasi i le asō, o le hatchback lea na fanaina ane le minivan lea sa iai i tua le teine talavou ma afaina ai, sola ese ai le hatchback ae agai le minivan i se pamu penisini i Sandringam Road ma logo ai loa leoleo.
Aveina atu le teine talavou i le falemai i Aukilani mo togafitiga ma o loo iai pea i le taimi nei.
Fai mai leoleo ua matuai lagona le faanoanoa i lenei ituaiga amioga ua alia’e mai ma e matuai lē taliaina e leoleo lea tulaga ma o le a silasila iai le matagaluega ma le toto’a ma sailia i latou na faatupuina lea faalavelave.
Talosagaina ai e leoleo nisi sa ono silafia ni faamatalaga i lenei mataupu ina ia fesootai ane i le laina 105.
Finagalo faaalia o nisi o le komiuniti lea i le asō ua faailoa ai e le toatele ua tatau lava ona matuai sailia i latou na faatino lenei faalavelave ma ave i le tulafono.
