Tala faanoanoa i se tina ma si ana tama teine ua maliliu ina ua lavea le latou taavale i Niu Sa Uelese.

Fai mai o le tina e 26 tausaga sa malaga ma tamaiti e toatolu i le taavale agai i Kuiniselani i luga o le Bruxner Highway i le vaiaso nei ae tifa ai le taavale i tua ma le alatele ma lavevea ai.

Fai mai na maliliu ai le tina lea ma lana tama teine e na o le fa tausaga le matua ae o isi tamaiti e toalua o tama uma e tasi le tausaga o le isi ma le isi e 9 tausaga na maua latalata ane i le vaega na tupu ai le faalavelave ma auina atu loa i le falemai mo togafitiga.

E molimau nisi na muamua taunuu atu i le nofoaga o le faalavelave, o se vaaiga faanoanoa tele aemaise le aofia ai o nai tamaiti.

O loo faaauau le suesuega a leoleo i le taimi nei e tusa o lenei faalavelave ae ua faailoa ua faasolo manuia nai tamaiti sa aveina atu i le falemai.