O se faamatalaga a le Auckland Transport i le taeao nei ua ta’ua ai o se matua’i faanoanoaga le faalavelave na tulai mai i Aukilani i le taeao analeila ua maliu ai se tagata na savali ane i le alatele ina ua lavea i se pasi.
O le One News ua lipotia ai o Pukekohe na tupu ai le faalavelave ma ua faailoa i le pepa o faamatalaga mai le Auckland Transport poo le ta o le 10 i le taeao na tupu ai le faalavelave ma ua faaoo faamaisega ma faamafanafanaga i le aiga o lē ua aafia.
O loo galulue nei le Auckland Transport ma leoleo i le su’esu’eina o le faalavelave ma ua tuuina foi le fesoasoani i le aiga o le avepasi na aafia ma ave lona livi a o faia le su’esu’ega. O faamatalaga a nisi o molimau o loo ta’ua i le televise tasi ua faamatala ai pe ā ma le 9 taavale a leoleo na iai i le nofoaga lea i le taeao analeila ma ua ta’ua e sea molimau o le pasi na taumafai e liliu agai i le itu agavale ae o le tamaitai na aafia sa kolosi ane e foliga mai o se pamu penisini o loo i lea faaitu ma lavea ai loa.
Fai mai le molimau na vaaia leoleo ma le aufaigaluega a le taavale a le falema’i o taumafaia galuega laveai i le afaina peitai e lei manuia.
Ua faailoa e leoleo e moni sa maliu ai lava lē na aafia i le nofoaga a tupu ai le faalavelave ma o loo faatali nei le i’uga o su’esu’ega.
