Ua faailoa e le pulega o le lakapi i le lalolagi i se lipoti ua faasalalau e le leitio a Niu Sila, e leai sana faamatalaga e faia i matāupu faalotoifale i le pulega o le taaloga lakapi i isi atunuu.
Peita’i ua faaalia i lea lipoti afai ae faatūina se isi iuni lakapi a Samoa e ese mai i le pulega o loo iai nei o le taaloga i lo tatou atunuu, e ono faia ai se faai’uga a le pulega o le taaloga i le lalolagi e faamālōlō lē tumau pe suspend lona toe avea ma sui auai o le pulega o le lakapi i le lalolagi.
Ua faailoa e le ta’ita’i o le malo le afioga i le Palemia ina ua fesiligia i le fono ma tusitala i le Aso Lulu, ua maua atu le tali o lana tusi na ave i le pulega o le lakapi Samoa ma ua failoa atu ai e lē aveesea sui o le komiti faafoe.
O le tali lea ina ua tuana’i ai le faamavaega a lē sa avea ma ta’ita’ifono ina ua mae’a lona taimi i le tofiga le susuga Tuilaepa L Sailele Malielegaoi.
Se finagalo o le Palemia susuga Laaulialemalietoa Leuatea Polataivao Fosi i le feiloa’iga ma tusitala.
Ua faaalia i le lipoti a le leitio a Niu Sila o le faaono faamālōlō lē tumau o le avea o Samoa ma sui o le pulega o le lakapi i le lalolagi e mafai ona faatino, pe afai e faatū se isi iuni lakapi e pei ona faailoa e le Palemia o le tatou atunuu.
O lea tulaga e pei ona faailoa i le lipoti e ono aafia ai tulafono o loo lima ta’ita’iina ai le pulea o le lakapi i le lalolagi aemaise pe afai o le a aiāina e pulega a le malo le tulaga tuto’atasi o le pulega o le taaloga e lē gata i Samoa ae o atunuu uma.
