Ua lauina le iuga o le leoleo falepuipui lea sa ia tautino i le maliu ai o se tagata tietie uila i se faalavelave na tupu ma ua faamaonia moliaga ae tuina iai le faasalaga i le komiuniti.
Ua faatonuina foi e totogi le 2 afe i le aiga o le ua maliu.
O lē na molia sa feagai ma moliaga o le avetaavale faatamala ua mafua ai le maliu ma sa tulai i le faamasinoga i Manukau i le aso ananafi.
O lē na aafia e 70 tausaga le matua e suafa ia Owen Young. O le faalavelave na tupu i le fetaulaiga ala i le va o Ararimu Rd ma Great South Rd i Aukilani i le masina o Aperila tausaga na tea nei.
Ua faatonuina lea alii e totogi le 2 afe i le aiga o lē ua maliu atoa ai ma le faasalaga e 200 itula faigaluega i le komiuniti. Ua faaleaogaina foi lona laisene avetaavale mo le 12 masina.
Fai mai le faamasino o le faamaoniga o le moliaga e le faia ma le ituaiga tagata e iai lē na molia ma o loo ta’ua foi o ia o se tagata lelei peitai na ia faia se mea sese ua aafia ai i se tulaga ogaoga.
