E 50 tausaga le matua o se alii ua faasala nei i le to’ese mo le 3 tausaga ma se tama’ita’i e 44 tausaga le matua ua nofo vaavaaia nei i le fale poo le home detention mo le 11 masina, ina ua o la ioeina moliaga e 16 o le taufaasesē e ala i lo la pelogia o le Ofisa o Femalagaa’iga ma lo la faaaogā faagaoi o ni faamaumauga a nisi o tagata mai Hungary.
I le taimi nei o loo tapu ona faasalalauina suafa o i la’ua ua aafia nei i le tulafono.
I talaaga o gaioiga a i la’ua ua molia, e faapea na taunuu mai i Niu Sila i le tausaga e 2011 i le faaaogā ai o ni faamaumauga a ni tagatānuu mai Hungary e la te silafia lelei.
Ma i le iai i totonu o le atunuu mo le 5 tausaga, na o la faaaogā ai ni faamaumauga fafau e talosagaina ai le tele o visa e pei ona iai le visa tafao, o le talosaga mo le nofomau, ma le talosaga e avea ai ma sitiseni o Niu Sila.
Māua i faamatalaga mai le Ofisa o Femalagaa’iga, na faaalia ai le nanā ai e le alii ua aafia ona moliaga mai gaioiga lava nei ma faiga faaālatua ma le lē sa’osa’o i totonu o le atunuu o Hungary, ma le ufiufi ai o le mea moni i o la tagata a o taumafai e faatino se talosaga mo se visa o lona atalii.
I su’esu’ega a le INZ na o latou maua ai loa taumafaiga taufaasesē a i la’ua nei.
Māua na ioe lava le alii i ana gaioiga faasolitulafono, ae na faaalia le lē fia talanoa o le tama’ita’i.
Faaalia e le sui o le MBIE ma le DIA, o lenei matāupu e atagia mai ai le mautū o fuafuaga e faatino le soligatulafono, pe a tilotilo i le tele o faamaumauga ma gaioiga e ufiufi pe nanā le mea moni, ae solia le tulafono o le taufaasesē ai o le pulega o femalagaa’iga.
Puna o Faamatalaga: https://www.immigration.govt.nz/about-us/news-centre/couple-sentenced-for-immigration-and-identity-fraud/?
