E latalata i le 15,000 laisene avetaavale o tagata Niu Sila ua liki i tua i le taimi na gaoia ai faamaumauga a le Latitude Financial Services.

O lea faamaoniga ua aumai e le Waka Kotahi ma e faapea e oo mai ananafi o loo suesue pea le tele o le aafiaga ua iai.

I se lipoti mai le Latitude Financial ananafi e tusa ma le 7.9 miliona laisene avetaavale o tagata Ausetalia ma Niu Sila ua alu ai, ma o le 3.2 miliona o lea aofaiga poo le 40% o faamaumauga na tuuina atu i le kamupani i totonu o le 10 tausaga talu ai.

E tusa ai o tusifolau ua faamaonia mai ai e tusa ma le 53,000 tusifolau ua gaoia ma o se siitaga tele lea pe a faatusa i le 1,300 ma ona tupu na ta’ua mai e le matagaluega o le va i fafo a Niu Sila i le vaiaso faatoa uma atu.

Ae i se lipoti mai le Waka Kotahi ma le Latitude, o le laasaga e sosoo ai i le mae’a o suesuega o loo faasolo pea nei o le faafesootai o paaga aafia.

O lea foi ua mae’a ofo mai le Latitude e na te faatupeina ID o tagata ua gaoia pe a finagalo lē e ana e toe fai se ID fou.