Ua lata mai le faaiuga o le tausaga faaletupe ma ua oo foi i le taimi e mataitu ai e tagata vaegatupe e toe maua mai i lafoga totogi poo tax return, o se faaola totoga i lenei vaitau o le taugata ma le faigata o le soifuaga.
O le aso 30 o Iuni e mae’a aloaia ai e tausaga faaletupe ma amata atu ai i le aso muamua o Iulai le isi tausaga faaletupe ma agavaa ai foi mo le tuuina i totonu o talosaga mo tax return.
O nisi o tusitusiga i luga o upega tafailagi ua ta’ua ai e moni e amata agavaa atu mo le tuuina talosaga i le amataga o Iulai ae ua lipotia e fautuaina foi e le ofisa o lafoga le tau faatuai teisi o talosaga agai i le tau faaiuiuga o Iulai ina ia maua ai faamatalaga e faatatau i le tax return ina ia faigofie ai ona faatumu faamaumauga o talosaga pe afai e maua uma ane faamatalaga manaomia.
Na faailoa e le sui mai le Ofisa o Lafoga i se faatalanoaga i le Alaata 9 a Ausetalia e telē le avanoa e misi ai i le tagata nisi faamatalaga tāua e faatatau i lana talosaga i se taimi vave a o lei maua uma atu faamaumauga manaomia ae a maua ma atoatoa uma faamaumauga ae lei tuuina le talosaga, o le a tele le galuega e faasaoina e faia e le tagata ma ua faailoa foi afai e faatino le talosaga i luga o upega tafailagi i le myTax website e lua vaiaso e faatali ai, ae a faatumu le talosaga ma lafo i le meli agai i le ATO e ono umi ona faatali ma e ono oo atu i le 10 vaiaso le umi.
