Ua tulalata atu lava i le aso ma le taimi e faataunuu ai le sailiga o le siamupini o le Ipu o le lalolagi i le faagatama o le lakapi liki pei ona tausinio iai ‘au a le lalolagi atoa.

O le taeao nei i Samoa ua vaaia ai le faaaloalo ma le lagolago a le matagaluega o leoleo ma le tineimu i le Toa Samoa e ala i le faia o le latou haka ma le peseina o le vii o le ‘au a le atunuu i le taimi masani e sisiina a’e ai le tagavai o le atunuu i taeao taitasi i le taulaga i Apia. 

O ni vaaiga faaosofia ai le lototele o le toatele o nai o tatou tagata aumau i atunuu eseese o le lalolagi ma o ni tulaga o loo matau lelei e alo o le atunuu o loo i le Toa Samoa e pei ona fesiligia ai le alii o Stephen Crichton e le aufaasalalau faavaomalo e uiga i le tulaga lea, ma ia ta’ua ai o loo latou matauina ma matamata i videos ma feau faamalosi mai tagata Samoa i itu e fia o le lalolagi ma o se faamalosiau tele foi lea mo i latou.

E pei foi ona iai faamanatu ma fautuaga mai taitai o le atunuu aemaise auauna a le Atua, ia tapuai ma le lotomaualalo aua o lalo lava e saili ai malo.