E 497 alii ma tama’ita’i o le atunuu ua faauu i le faauuga a le Iunivesite Aoao o Samoa lea sa faagasolo i le faletaalo o le taaloga soka i le malae o taaloga i le Apia Park i le Aso Lulu o lenei vaiaso.
Na saunoa ai i le saunoaga autū na aami, le Pule o le Iunivesite o Otago i Niu Sila o Grant Robertson, o se tasi sa avea ma faipule o le Palemene o Niu Sila ma tauaveina tofi Minisita o Tupe, Minisita o le Va i Fafo, o ia foi le Sui Palemia lona 19 o Niu Sila a o lotolotoi ai i upufai o lea malo.
O i latou ua faauu ua maua tusipasi, ma faailoga tipiloma ma tikeri i matāupu e faasino i tomai faapitoa sa a’oa’oina ai i le iunivesite a le atunuu.
O le tasi lea o tulaga maoa’e na faailoa i le saunoaga a le pule o le Iunivesite a Otago a o galue i le ofisa o le malo o Niu Sila i Apia i le 30 tausaga ua mavae, e to’aitiiti lava fanau a Samoa sa maua le avanoa i le iunivesite aoao sa a’ooga ma faamanuiaina i faailoga, peita’i o lana molimau i le faauuga o lenei tausaga, ua limaselau ma sili atu i latou ua faamanuiaina taumafai mai le Iunivesite Aoao o Samoa.
