E lata i le fitu selau talosaga ua laki a latou numera i le Se’i o le nofomau i Niu Sila mo lenei tausaga 2022, ma ua faailoa e le ofisa o le Malo Niu Sila i Apia ua atoa lelei i lea aofaiga avanoa nofomau mo Samoa e 1,650 mo lenei tausaga.
O lona uiga e tele talosaga e toatasi o loo ave le suafa ae o loo aofia ai ma isi tagata ma e patino tonu lava i aiga e aofia ai ulugalii ma fanau.
O loo aofia ai foi ma talosaga mai tagata taitoatasi ae e lē o faailoaina e le ofisa o femalagaiga a Niu Sila i Apia pe fia talosaga mai aiga ua laki, ae fia talosaga o tagata taitoatasi.
E lē o faailoaina mai foi pe fia le aofaiga atoa o talosaga na tuuina atu. O i latou ua laki o le a ave iai tusi e talosaga ai loa mo le faia o tapenaga o le nofomau e ala i le tuuina atu o vaega uma o loo manaomia.
O ē ua le faamanuiaina o le a toe talosaga i le tausaga fou pe a aulia. E pasia loa le 45 tausaga o le soifua o se tagatanuu Samoa e le mafai ona toe agavaa e talosaga i le nofomau i Niu Sila.
